Pomodoro technique.

(Hunbi neia hna thawh sâwt dan)

Pomodoro technique hi hun mumal taka hman ṭangkai dan(time management)  ṭha tak leh thil pakhata insawrbing(focus) nan te, hna khêk(procastination) hneh dân ṭha tak leh…hna thawh sawtna (productivity method) ṭha lutuk a ni bawk a.

Lehkha zirte, hna tihtur kan neih chi-ah pawh a hman theih vek a ni.

Pomodoro tih thumal hi Italian ṭawnga tomato(bawkbawn thûr) tihna mai a ni a. He tih dan phung rawn tichhuaktu hi Francesco Cirilli niin 1990 vela university zirlai a nih laia a hna thawh dan track nan, timer setna tomato pianhmang anga siam hi hun vawn nan a hmang ṭhin a. Chumi aṭanga pomodoro tih hming pawh pu a ni ta a.

He technique kalhmang chu hetiang hi a ni a : thil pakhatah hun eng emawti chhung(a hmuchhuaktu hi chuan minute 25 vel a ti a) alarm/timer kan kam anga. Chumi huntiam a rik hma chu engmah tihsan lova birh tur a ni. Hun tiam a zawh hnuah,chawlh lâwk(short break) minute-5 kan nei anga. Chumi hnuah minute 25 dang kan thawk leh ang, hetiang hian vawi 4 short break hnuah chuan chawlh kha kan inpe rei deuh ang.Minute 15-30 vel. Hetia minute 25 chhunga kan birh hunchhung zel hi a pomodoro lai tak a tih chu a ni ta a. A kâr laka chawlh zeuh zeuh neih ṭhatna chu kan thluakin thil pakhata insawrbing theihna (attention span) kha a rei lova ,rei tak tih ngar mgar tum pawh ni ila,ngaihtuahna kha a vak kual zut zut ṭhin a. Hun kan inbituk lo a nih phei chuan eng engah emaw kan penkualsan a,phone leh thildang kan tihsan daih ṭhin.

Chuan, a hunchhung hi minute 25 leh minute 5 kha a ni kher tur tihna a ni lem hran lova. Minute 40,darkar 1 te pawh kha kan ti thei a,a kalphung ngai tho khan.

He technique ṭhat ve riauna chu tihtur khekna lakah min veng kan tih tawh kha. Thil kan tih tur kan khek reng hi chu tlangpui thuah kan huphurh deuhte, a len tham avangte leh hun tam tak pek ngai nia a lan vangte hi a ni ṭhin a kawng tam takah chuan. Khatia, ‘Minute chuti chhung chauh kan ti ange’ ti a sana te kan han kam takah chuan a zuamawm ta deuh bawk a. Bul ṭan pawp kha a tiawl ta a ni.

Tin, he tih dân kalpui (apply) ve tur hian eng hmanraw dang hranpa vak mah kha kan mamawh lo bawk a,alarm/timer kha a ni mai a. Kan neih loh pawhin phone leh computer a awmsa kan hmang thei a. Chumi a remchan loh pawhin, sana pangai ah khan, chumi chin thleng tiin kan rilru khan kan chhinchhiah mai thei bawk a ni.

Hetia bul kan ṭan tawh rau rau a nih hi chuan kan thil tihah thawhtui laklawh te pawh a lo awl a. Alarm kha duh aiin a ri hma tih changte pawh a tam a,snooze maite pawh kha a awl a ni. A pawi lova,minute kha bithliah bur(fixed) a ni lo kan tih tawh kha, kan thawhtui leh tih laklawh deuh chuan sana kan snooze thei a. Kan insiamrem thei reng a ni.

Pomodoro technique kalpui dan kan sawi ang :-

1. I thil tih/thawh tur hmachhawpsâ pakhat thlang chhuak rawh. Entirnan: Lehkha zir/ziah te.

2. I duh zat minute chinah alarm kam rawh,sawi tawh angin minute hi mahni remchan dan anga siamrem mai tur a ni. Huntiam a thlen hma zawng thil dang engah mah pensan lovin chu thil chu tih ngar ngar tur a ni. Phone a message/ whatsapp/social media engah mah pensan loh tur.

3. Alarm a rik veleh i châwl lawk anga,tichuan a ngai ang bawkin alarm kam lehin i tinawn zel ang. A ṭum 4naah i chawl rei deuh ang.(Vawi4 tihchhuah kher zel pawh a ngai chuang lo , siamrem kha thil pawi a ni lo)

A awlai angrenga,nangni pawhin harsa in tih ka ring lo.Mahse he thil hotê hian hmasawnna kawngah leh hun hman ṭangkaina kawngah nasa taka a puih ve ngei cheu ka beisei tlat a ni.